又一次要讚讚史友們,之前提及過曹操本身係咪一位好打之人時,引用過暗榮《三國志八》曹孟德嘅武力值,隨即有史友就留言話曹操個數值咁低係咪無計倚天劍加嘅數值,係喎!曹操手上應該係有倚天劍。咁究竟,曹操係咪真係有倚天劍呢?

關於曹操擁有倚天劍,其實係來自小說內容,好似明朝羅貫中所著嘅《三國演義》當中,就有提及曹操有兩把寶劍,一名倚天,一名青釭。不過,呢啲都後世文人作出嚟嘅武器,曹操真正擁有嘅就可能係「孟德劍」。响梁朝陶弘景所著嘅《古今刀劍錄》,就對曹操嘅武器有咁嘅記載:「魏武帝曹操,以建安二十年,於幽谷得一劍,長三尺六寸,上有金字,銘曰『孟德』,王常服之。」

嘩!如果真係咁,啲遊戲係咪應該整返把孟德劍呢?

原圖:《大軍師司馬懿》劇圖