早幾日阿史就提到大白兔牛奶糖,仲講到呢隻糖喺中國人民艱難嘅日子入面有住好重要嘅意義,「七粒牛奶糖一杯牛奶」係唔少老一輩都記得嘅說話。同樣係同牛奶有關嘅一種食品,大良牛乳原來都係有住一段不為人知嘅故事。

大良牛乳,係一種原產自順德大良金榜村嘅食品,現時嘅大良牛乳主要係白色圓狀,味道就偏咸帶少少酸味,所以又被稱為「東方芝士」。唔講唔知,呢款奶類製品有住一段好悠久嘅歷史,耐到要喺明朝開始講起。

相傳大良牛乳始於明代,當時順德金榜村耕地好少,唔少村民都係靠養水牛為生,間唔中會賣下牛肉增加收入,但呢個方式周期太長,好難維持到收入。於是又有村民諗到賣水牛奶,但問題嚟喇,水牛只會喺哺乳期先至會有水牛奶,但喺水牛仔飲完之後,基本上唔會有太多奶可以賣到,所以有部分村民就會殺咗水牛仔賣牛肉,順便仲可以賣埋牛奶。

之但係,由此水牛奶嘅供應唔穩定,加上唔易保存,經常都有賣唔晒而需要倒走嘅情況出現。後來就有村民諗到一個方法可以好好保存水牛奶,就係以醋、食鹽加埋入水牛奶入面、經過加工就會得出一片片嘅大良牛乳。大良牛乳味道鹹中帶甜味,當地人食粥又或者就咁飲熱水都會加埋,於是就成為當地一種特色食品喇!

原圖嚟自網絡