就嚟到中秋節，相信史友們唔多唔少都會諗起中秋舞火龍，提到呢項習俗一下就會諗到大坑蓮花宮，而另一個地方就係薄扶林村。如果史友們有去過薄扶林村，都有可能睇過舞火龍之前村民都會先到李靈仙姐塔前拜祭，到底李靈仙姐又係點樣嘅一個信仰呢？

李靈仙姐同其他神祗有啲唔同，真係可以算得上係薄扶林村獨有嘅一個信仰。喺現時嘅薄扶林村入面，就有一座五米高嘅靈塔，相信呢座古塔係建於1916年，係為咗紀念「李靈仙姐」為薄扶林村降魔伏妖而建。

傳說係咁嘅，據講好耐之前薄扶林村有鬼物作怪，唔少村民都見到有鬼影、聽過有怪聲，晚晚都擔驚受怕。突然有一晚，有一位村民就夢見自稱「李靈仙姐」嘅少女應承幫佢哋趕走惡靈。結果村入面嘅鬼影同埋怪聲都真係消失晒。至於另一個講法就係話，當時唔少村民突然染疫，藥石無靈，就只好搵嚟一位道士祈福治病，而呢位道士就搵嚟「李靈」上身作法，結果村民就真係乜事都冇。

雖然唔知以上邊個講法先至係真，但就因為呢類事件，令到村民決心喺村內興建一座李靈仙姐塔作為紀念，並且每年農曆四月十五日訂為李靈仙姐誔，會有供奉儀式以及大戲。而每年舞火龍嘅時候，都會專門拜訪薄扶林村村內唯一供奉嘅神靈。

原圖嚟自網絡