呢排都同史友們講起唔少三年零八個月嘅歷史，當年嘅香港唔少街道都被日軍強行改名，就好似「香港仔」改做「元香港」、「皇后大道」改做「明治通」；曆法方面就廢除咗公元，用上「昭和」年號，香港境內亦都出現唔少神社、亦都加咗唔少日本嘅節日。簡單而言，其實成個社會都被迫進行日化，呢股風化亦都擴晒去到當時嘅學校。

其實喺三年零八個月期間，香港嘅教育係受到嚴重影響，學童人數由原來1941年118,000人最低跌到去4,000人，即係意味住大部分學童都失學。原本全港係有649間學校，但去到日佔時期就只係得返34間，日軍仍然都喺呢34間學校入面積極推廣日化教學。當時仲有得返學嘅小朋友，都係要以日文作為最主要嘅教育課程，雖然都會教下英文同國語，但佔嘅時間相當少，假如日文成績唔理想，仲會受到處分。

喺教學內容上，日軍嘅課程就提倡學童要認同日本文化，仲要學識日本禮節同國情，亦都加入唔少課文好似《興亞進行曲》、《從香港到東京》、《日本刀》、《忠靈塔》等等，向當時學生灌輸「大東亞共榮圈」嘅思想。

原圖嚟自網絡