繼續同史友們介紹韓戰時期嘅一啲故事，喺唔少歷史故事入面都可以知道，打緊仗嘅時候最忌就係亂軍心，但喺韓戰期間其實美國嘅駐遠東部隊總司令麥克阿瑟就忽然被炒魷，到底當中發生咩事呢？

要知道喺1950年6月尾，美軍就已經派出作戰飛機進入朝鮮半島投入戰鬥，喺7月7日，聯合國安理會、美國總統仲通過埋統一司令部決議，任命美國駐遠東部隊總司令麥克阿瑟作為「聯合國軍總司令」，授權佢喺韓戰當中指揮戰事。喺呢場戰事入面，麥克阿瑟就指揮過仁川登陸、越過三八線、仲對北韓發出「最後通牒」，可以話佢起咗好大嘅作用，但點知去到1951年4月嘅第五次戰役，佢就被美國總統炒魷。

原來雖然戰事係一路打緊，但麥克阿瑟同杜魯門之間就有唔少衝突，例如杜魯門喺1951年初就已經想同中國舉行談判，但麥克阿瑟就單方面發聲明挑釁中國政府；又例如杜魯門其實唔想同中國以及蘇聯有正門衝突，但麥克阿瑟就唔理咁多，好多情況下都違背華盛頓決策。杜魯門就曾經斥責過麥克阿瑟，話佢「這是對我作為總統和最高統帥而發布的命令的公然違抗。」

結果，去到1951年4月10，杜魯門就責成參謀長聯席會議主席布萊德雷對麥克阿瑟發出通知，「我以總統和最高統帥官名義，非常遺憾地免去閣下的駐日聯合國軍司令官、聯合國軍最高司令官、美遠東軍司令官、遠東地區美陸軍司令官職務。請閣下將指揮權立即移交給李奇威將軍。」當時全世界都喺無線電聽住呢個消息，都真係幾震撼！

原圖嚟自網絡