舞火龍係為消災滅瘟？

今日除咗係國慶嘅大日子之外，對普通市民嚟講今日都係團團圓圓嘅中秋節，喺呢一日除咗會「食燈籠、玩月餅」之外，以往每一年港島嘅大坑同埋薄扶林都會依照傳統「舞火龍」應節。呢項傳統活動睇落就真係好有節日特色，但原來最初出現嘅原因竟然係為咗消災滅瘟？

大坑、薄扶林嘅舞火龍同樣都被列入非遺項目入面，佢哋故事背景亦都差唔多。先講大坑舞火龍，相傳喺1880年，呢條客家村就發生咗一場嚴重嘅瘟疫，用盡方法之下都醫唔好村民。於是就有村民決定紮作一條龍，上面插滿香枝，希望可以通過咁樣消災滅瘟。村民就喺農曆八月十四、十五、十六三個晚上，舞動著火龍繞村遊行，沿途仲放埋炮仗，結果疫症真係停止，自此以後呢個就成為大坑居民嘅傳統。

至於薄扶林嘅舞火龍起源都係差唔多，相傳喺19世紀，薄扶林一帶都係發生一場疫症，都係藥石無靈，冇幾耐村民就諗到用龍係祥瑞象徵、香火又可以淨化村落、於是就決定以禾草紮成龍、龍身插滿燃點香枝巡遊全村。結果當然係驅除到瘟症，呢項習俗亦都流傳到依家。