中秋節要「拜月娘」?

講到中秋節嘅傳統，除咗玩燈籠、食月餅、舞火龍，但「拜月娘」呢樣習俗唔知史友們又有冇聽過呢？

阿史細個果陣，其實都曾經見過有人「拜月娘」，後尾先知道呢樣原來係屬於廣府、潮汕嘅習俗，唔少喺香港住嘅潮汕人都仲有堅持緊中秋「拜月娘」。所謂嘅「拜月娘」其實係一種祭月儀式，相傳起源自先秦先期，當時係叫做「夜明」或者「夕月」，係一件家家戶戶都會做嘅事。具體嘅儀式其實已經簡化咗好多，多數都係會由屋企嘅老人家負責，喺祭月用嘅枱上擺開月餅、田螺、芋頭等貢品，再供上茶酒喺月亮升到半空就開始焚香禮拜，成個儀式係要面向月亮進行，最後就會焚燒月光紙完成儀式，成家人先會坐埋一齊食賞月食月餅。

唔講唔知，呢項習俗喺潮汕仲有特別嘅意義，「男不圓月，女不祭灶」，月屬陰所以又叫做太陰娘，期待出嫁嘅女仔都會拜月，希望可以搵到一個好老公，所以又有首歌謠：「中秋夜，月娘娘。深深拜，團團圓。好夫婿，結良緣。今年團圓，明年團圓，年年團圓」。