之前介紹完曹操嘅兵器同良駒，今次阿史嘅無聊症又發作，繼續講下曹操手上嘅「寶物」。兵器加武力，良駒就令武將响單挑時能百分百成功挑脫，咁兵書就自然係提升統率能力，而曹阿暪手中就有一本叫《孟德新書》嘅兵書。

响《三國志》遊戲當中，對《孟德新書》嘅介紹係咁：「曹操著作的兵法書，因為曹到張松的嘲笑而親手燒毀了。」其實，《孟德新書》呢個名係响明代小說《三國演義》中出現。响《三國演義》第六十回中，就有講話原為劉璋謀士嘅張松去見曹操說服佢出兵救劉璋，不過佢去到許昌就受到冷待。心高氣傲嘅張松後嚟見到曹操後唔多服氣，不斷頂撞佢，曹操謀士楊修覺得佢係個人才，於是就同佢對下咀，仲拎咗曹操所著嘅兵書《孟德新書》叫佢點評。點知張松就話：「此書吾蜀中三尺小童，亦能暗誦，何為『新書』？此是戰國時無名氏所作，曹丞相盜竊以為己能，止好瞞足下耳！」後嚟曹操知道張松咁樣評價自己兵書為抄襲之作，一下子就將本書燒咗喇！

故事還故事，咁《孟德新書》係咪真係存在呢？其實曹操就真係有著過兵書，响《三國志‧魏書‧武帝紀》當中就有咁嘅記載：「自作兵書十萬餘言，諸將征伐，皆以新書從事。」而呢本書亦無被曹操親自燒毁，因為响唐代兵書《李衛公問對》當中，就有提及過「案曹公《新書》曰：『己二而敵一，則一術為正，一術為奇；己五而敵一，則三術為正，二術為奇。』此言大略爾。」所以呢本曹氏著作應該係响唐代都有流傳。不過，今時今日呢本書已經散佚，無得睇喇！

原圖嚟自網絡