寶雲道姻緣石有個 日本憲兵同中國女子愛情故事？

近排因為疫情關係，大家都冇得出去旅行，可能因為咁都有唔少人嘗試發掘下香港嘅景點，其中一個最近好熱門嘅就係位於寶雲道嘅姻緣石。據講呢塊姻緣石相當靈，係可以「求配偶得配偶，求子嗣得子嗣」。

呢塊姻緣石鄰近「肇輝臺」，形狀就好似一枝石筆斜插喺筆座上，原來當中有段不為人知嘅故事。相傳喺三年零八個月期間，香港就有一位女子同一個日本憲兵相愛，但佢哋之間嘅呢段愛情故事就受到家人反對。於是，佢哋盲一齊私奔到山上雙宿雙棲，亦即係寶雲道現址。但冇幾耐，佢哋就雙雙餓死。喺北角一帶嘅婦女忽然就收到佢哋報夢，話可以幫助有情人終成眷屬，所以自從1950年代開始，就陸續有唔少市民去到山上祈求良緣。

可能因為真係靈驗，去到1964年仲有唔少香港市民集資粉飾呢塊岩石，將佢油繪成人形，甚至仲加設咗幾處神壇。每逢農曆初一及十五日，都有人來朝拜。