北洋水師「定遠艦」有塊18噸鐵甲？

有留意開中國近代史、又或者睇開清朝軍事嘅史友對北洋水師應該唔會覺得陌生，如果再具體啲講到北洋海軍旗艦「定遠艦」可能直頭有印象，而前排呢艘曾經沉沒嘅沉艦遺址就被考古人員發現到！

北洋水師本身就係晚晴時期洋務派重金打造嘅一支新式艦隊，配上唔少現代嘅設施，係近代海軍實力最強、最有規模嘅一支海軍。而「定遠艦」呢個名真係唔簡單，佢係成支海軍入面嘅旗艦，當年仲被稱為「亞洲第一巨艦」。咁大嘅一艘戰艦本應好易搵到，但水下考古嘅環境同地面唔少，要完全辦別到實體其實係相當困難，咁水下考古隊又係點樣識別到呢？

原來考古隊喺沉艦遺址成功將一塊重約18噸嘅戰艦鐵甲起吊出水，呢塊鐵甲就成為成件事嘅關鍵證據。今次發現嘅鐵甲長2.86米、寬2.60米、厚0.33米，呢啲數據都同歷史合同入面係叫做「康邦鐵甲」嘅定遠艦鐵甲一模一樣，而呢塊鐵甲據講仲喺甲午戰爭期間黃海海戰抵擋過圍攻。而定遠艦最後就喺甲午戰爭中被擊傷，1895年沉沒，近年先至展開調查工作。