圍村「食山頭」

早幾日係中秋節，阿史就同史友們介紹咗唔少傳統中秋節會做嘅習俗，既然都講開香港嘅一啲特色，今次就同史友們介紹下以前好興嘅圍村「食山頭」啦！

「食山頭」原理上唔係一種獨立存在嘅習俗，一定要係春秋二祭入面先會舉行。春秋二祭係唔少傳統圍村入面重要嘅宗族活動，而傳統嚟講拜山都係屬於圍村男人嘅事，由村內男丁負責統籌祭祖。

傳統嚟講，新界嘅圍村喺祭祖果陣都會由族人將成隻生豬抬上山，同行仲會帶埋大鐵鑊、器皿，以及煮盆菜的配料上山。所謂嘅「食山頭」其實就即係喺山上嘅祭祖禮成之後，即場砍開隻生豬加上腐竹、筍蝦、魷魚等材料，大家就揀一個祖墳又或者附近圍起嚟煮盤菜慶祝，所以就叫做「食山頭」。以前其實都仲有唔少圍村人會「食山頭」，但隨住人口減少再加上唔想喺山上燒柴煮肉，慢慢「食山頭」就轉咗做喺祠堂食飯。