話說阿史個死黨近日响內地娶老婆,响度先祝佢同阿嫂白頭到老。阿史問佢會唔會接阿嫂去香港住,佢就話依家高鐵咁方便,幾個鐘就返到去,反而係佢返上去生活多啲。

兩地跨境婚姻呢個現象,其實响香港相當普遍,咁係幾時開始興起呢?應該就係七八十年代個陣。個陣基本上係有兩個契機令跨境婚姻盛行,一個係內地推行改革開放,好多制度同整個社會風氣都開放咗。另一樣就係香港當年經濟發展得好,再加上內地生活指數同物價都唔高,即使响香港只係基層人士都有足夠資本返去娶老婆。就係咁,以往唔少單身港男都會返去內地娶老婆,之後就通過單程證制度接老婆嚟香港住。

不過,近年呢種情況就有所轉變,首先係兩地經濟水平逐步拉近,嫁到香港對內地人而言已經無乜吸引力。另外就係唔少香港女生選擇北上嫁人以及定居內地,因為內地唔少男生擁有高學歷同收入唔錯,令唔少香港女生願意嫁到內地。

原圖嚟自網絡