今時今日港鐵已經成為咗大家日常生活嘅一部分，東鐵、西鐵、馬鐵等等陸續落成都令到大家嘅生活愈嚟愈方便。喺呢幾條鐵路線都未出現之前，喺兩鐵都仲未合併之前，其實早年香港就只係得一條九廣鐵路，而呢條鐵路亦都喺1911年10月5日正式通車。

喺19世紀末，雖然英國管治咗香港一段日子，但當時嘅香港仍舊同廣州有住好頻繁嘅商貿活動，於是港府就同清政府決定一齊興建一條連接香港同埋廣州嘅鐵路。呢條鐵路分成兩段建成，喺香港嘅一段就係由1906年動工定線、測量嘅九廣鐵路──英段；至於另一段由清政府興建嘅就叫做華段。

九廣鐵路──英段全長35.4公里，過程中用咗唔少橋樑、基堤，仲需要興建5條隧道，歷時3年先建成。至於華段就因為各種原因，去到1908年先至動工興建。

1910年10月1日，耗資130萬英鎊嘅九廣鐵路──英段落成啟用，喺當年嘅今日，華段鐵路亦都建造完成啟用，並且喺深圳舉行開通儀式，清廷兩廣總督張鳴岐同郵傳部左侍郎李經方以及助理輔政司金文泰同港督盧吉爵士都有出席儀式。

原圖嚟自網絡