《康熙南巡圖第六卷》 首次全卷合璧展出

近排喺蘇富比嘅一場拍賣會入面，就有一件只展出唔拍賣嘅藏品相當引人注目，呢一件就係第一次以全卷合璧形式展出嘅珍貴文物——《康熙南巡圖第六卷》。

《康熙南巡圖第六卷》歷年都被稱為係重磅級國畫，亦都被稱為係清代版《清明上河圖》嘅宮廷鉅製之作，總數一共有成十二卷，故宮現藏五卷，巴黎同埋紐約博物館各收藏兩卷，有兩卷下落不明，而呢卷就係唯一一卷由私人收藏嘅。第六卷嘅《康熙南巡圖》其實喺百幾年間都唔完整，被分割成七段流落海外。

咁呢七段第六卷嘅《康熙南巡圖》又係點樣合返埋一齊呢？咁就全靠一位有心人喇。原來有一位收藏家林霄先生，本身係從事收藏歷代法書墨跡，但就一次機緣巧合見過《南巡圖》，於是就用咗接近十年時間先後買落前六段《南巡圖》，而最後一段其實林霄先生並冇足夠資金買到，今次展出亦都係由蘇富比同尾段收藏家達成意向先至可以合璧展出。