早排阿史都同史友們介紹過太平山街嘅歷史,當時鼠疫同埋廣福義祠嘅環境衛生嘅問題就令到當時港府決定向當時華人集資喺港島興建第一所華人中醫院,正係東華醫院。而喺當年嘅今日,喺九龍呢邊都有一間醫院落成,就係後來成為東華三院之一嘅廣華醫院。

廣華醫院位處油麻地窩打老道25號,喺1911年由東華醫院董事局成立,而呢個決定就係同著名律師及政治家何啟爵士有關。「廣華」嘅意思係廣東華人為主,喺20世紀初,九龍區基本上無大型嘅醫院設施,唔少病人如果有乜病痛都需要舟車勞頓到港島就醫。於是喺1907年,就有一班社會賢達決心改變呢個現象,倡議喺油麻地設立中式醫院,以應對九龍同埋新界急增嘅人口。

喺1911年8月24日,香港政府通過名為《1911東華醫院擴展法例》,喺油麻地撥出一塊12萬3,500平方呎土地興建醫院。雖然同時都有發放一次性嘅30,000港元發展基金,並且每年都會有津貼6,500蚊,但呢啲都唔足以營運一間醫院。

最後喺1911年10月9日,歷時5年耗資139,340元先廣華醫院建成,當日就有港督盧吉爵士主持開幕。廣華醫院第一任值理共6位,包括陳柏朋、方建初、崔秩山、梁植初、余植卿及香文,醫院早期不足嘅營運開支都係由佢哋填補。

原圖嚟自網絡