近排因為疫情嘅關係,大家都冇機會離開香港去旅行,於是唔少本地嘅景點就成為咗大家星期六日必去嘅地方,其中一個必定塞滿人嘅就係呢個被稱為「香港千島湖」嘅大欖涌水塘。

大欖涌水塘位於新界西部嘅大欖郊野公園入面,呢個水塘係二戰之後第一個興建嘅水塘,其實早喺30年代港府就已經計劃喺新界西部興建一個水塘,但無奈因為戰事而中止。結果喺戰後1947年先至重啟相關嘅研究,但真正籌足錢展開工程,就要等到1952年。

當年興建呢個水塘係用咗4,000萬港元開始,歷時五年建成咗橫跨大欖涌谷嘅150呎高主壩同埋3條副壩,一共可以儲水量45億加侖。呢個水塘唔單止係用嚟收集雨水,仲係全港第一個有水力發電功能嘅水庫,可以發電畀濾水廠運作。早年嘅海水化淡廠嘅淡水都係儲藏喺呢道,時至今日,大欖涌水塘就用嚟收集東江水。

水塘範圍內有住唔少丘陵地帶,一當水塘充滿水嘅時候,起伏嘅丘陵就形成咗一個個島嶼,「香港千島湖」就係咁樣嚟喇!

原圖嚟自網絡