近排內地就有一部戰爭片上映，名為《八佰》，係講述1937年淞滬會戰期間，中國守軍駐守在四行倉庫抵抗日軍入侵上海、奮戰四日四夜嘅英勇事跡。呢套電影上映五日票房達到2.34億，成功超過晒同期上映嘅電影，而睇完呢套電影之後，唔少民眾都紛紛走到上海四行倉庫舊址果度向軍人致敬，電影都真係幾有感染力！

咁呢段歷史到底又係點呢？喺1937年7月7日，日本就發動七七事變，既進攻晉中腹地又密謀緊侵占華東地區，所以冇幾耐就發動埋八一三事變，雖然缺乏後勤支援、亦都冇空中同埋火力優勢，但中國守軍仍然死守住上海。

喺1937年10月26日，日軍突破咗守軍嘅大部分防線，經過多次轉移之後，守軍就決定第五次轉移遷到四行倉庫。當時守軍第八十八師參謀長張柏亭就發現四行倉庫附近有兩個內儲30萬立方米煤氣巨型煤氣罐，而且鄰近上海公共租界範圍，有齊美英軍隊，所以絕對有利防守。當時蔣中正就命令閘北區所有軍隊撤出，淨係留低第八十八師單獨留守，亦都希望通過呢個舉動可以向國際社會表明中國抵抗日本侵略戰爭上嘅堅決態度。

結果喺10月26日晚10點，只有400人嘅守軍就喺四行倉庫駐紮，所謂四行就係由金城、中南、大陸、鹽業4間銀行合資建設嘅倉庫。隨住主力部隊西撤，無任何後援嘅四行倉庫保衛戰喺1937年10月26日至11月1日發生。呢批部隊成功阻止日軍多次進攻，最後保衛成功亦都振奮當時中國人嘅士氣。可能有史友會問明明就只有400人，點解會叫做「八百壯士」呢？原來喺「四行倉庫保衛戰」其中一位指揮者楊瑞符嘅《孤軍奮鬥四日記》入面就有一段10月28日晚運出傷員果陣嘅描述描述：

「我當囑咐出外就醫的士兵說：你們出去，有人問四行倉庫究竟有多少人，你們就說有八百人，決不可說只有一營人，以免敵人知道我們的人數少而更加兇橫，後來轟傳世界的八百孤軍的數目，就是這樣來的。我團五二四的團長本來是韓憲元，而今天一般人誤稱為謝團長，也就是在這八百的數目字而推測出來的」，呢個就係八百壯士嘅由來。

原圖嚟自網絡