尋日提及過三國時期曹植嘅《感鄄賦》，亦簡單介紹咗曹丕之妻甄氏。對於甄氏嘅故事，相信史友們都唔會陌生，因為响好多小說、影視作品甚至電子遊戲（梗係有真‧三國無雙啦！）都有甄氏（即甄姬）嘅出現。不過後世流傳關於甄氏嘅事蹟，有唔少都似乎係假假地。

响《三國志‧魏書‧后妃傳》中，對甄氏嘅生平有相當詳細的記載。甄氏為中山無極人，漢太保甄邯嘅後人。佢最初先嫁俾袁紹之子袁熙，後嚟就改嫁俾曹操之子曹丕，仲生咗曹叡同東鄉公主。後嚟曹丕稱帝，繼而寵幸郭后、李陰貴人，甄氏失寵後就有怨言，結果曹丕大怒，遣使賜死。之後曹丕死咗，曹叡繼位，就將生母追諡為文昭皇后。

其實响正史當中，關於甄氏嘅事蹟就無太多感情部分，關於曹操三父子同甄氏嘅感情爭拗，並非嚟自二十四史，而係嚟自唔同嘅著作，包括三國時期嘅《魏略》，以至南朝名著《世說新語》等。好似話曹操攻破鄴城後要召見甄氏，《魏略》就有咁嘅記載：「姑乃捧后令仰，文帝就視，見其顏色非凡，稱嘆之。太祖聞其意，遂為迎取。」而响《世說新語》中，亦有話曹操攻破鄴城後要召見甄氏，但就被曹丕捷足先登。至於曹植同甄氏嘅緋聞，就主要同《感甄賦》有關，而呢個講法其實係由唐朝文人李善响《文選》所提出，認為係曹植懷念佢阿嫂而作。

有一個論點就話，後世文人對曹操同曹丕嘅評價相對負面，繼而刻劃出佢哋唔顧親情嘅形象，所以關於曹操父子都迷戀甄姬嘅民間故事，就係從呢個觀點出發，之後不斷加鹽加醋。

原圖：網絡