「八百壯士」現實結局又係點？

尋日就同史友們介紹咗近排內地嘅一套熱門抗戰電影《八佰》，阿史亦都有講到守軍之所以要死守四行倉庫，其一個原因係想向國際表示中國會堅決抗日軍嘅侵略，其二就係想確保當時嘅主力部隊有足夠嘅時間向西撤離。呢場四行倉庫守衛戰當時就係守軍成功抵禦到入侵，但其實現實結局仲未完，呢班守軍嘅下場相當悲慘！

當時係1937年10月，淞滬會戰尾聲，中國軍隊亦都損失慘重，當時蔣介石下令第88師單獨留守上海，並且係要佢哋「死守上海最後陣地」。就係咁樣，當時嘅團長謝晉元就帶住400幾人扮成800幾人守住四行倉庫。呢場守衛戰成功抵抗到日軍，但當守軍撤軍去到上海租界嘅時候，就隨即畀英軍強制繳械，仲軟禁埋佢哋。

去到1941年4日，守軍嘅團長謝晉元就被偽汪精衛政府派人暗殺，當時上海市民相當傷心；而太平洋戰爭爆發之後，上海租界亦都落入日軍手中，呢排四行倉庫嘅「八百壯士」就被日軍俘虜，送到去唔同嘅戰爭前線挖壕溝、做苦工，最遠嘅甚至仲去到新幾內亞。戰爭相當殘酷、苦工亦都唔容易捱，去到二戰結束之後，由各地返到上海嘅俘虜只有一百幾人，呢個就係「八百壯士」現實嘅結局。