阿史平時入到茶記Lunch，無論食乜餐都好，都會揀碗羅宋湯嚟飲下。之但係，原來羅宋湯由俄羅斯傳到嚟香港嘅過程都真係幾轉輾下，今次阿史就同大家介紹下啦！

先講下羅宋湯嘅原身先，呢款湯其實係發源先烏克蘭嘅濃菜，部分地方就以甜菜作為主料、部分地方就係用番茄，但無論係邊款喺東歐同埋中歐都幾受歡迎。咁到底呢款湯又係因乜事傳咗嚟香港呢？

原來喺1917年，俄國就爆發「十月革命」，蘇維埃政權因而成立，亦都因為咁而發生俄國內戰。當時屬於地主、貴族等反布爾什維克嘅階層就因為戰敗而走難到中俄邊境哈爾濱，亦都有部份人行得更遠去埋去上海。當時呢班俄羅斯人（又叫做白俄）就帶咗羅宋湯食譜，由於氣候問題，上海並冇太多紅菜頭，上海人亦都食唔慣咁酸嘅湯，於是就對羅宋湯進行改良，用高麗菜取代紅菜頭、喺番茄醬加入白砂糖中和味道，甚至仲有加入牛肉湯做湯底，令到羅宋湯成為咗上海民間嘅美食。

好景不常，1930年代日軍就對中國東北進行入侵，上述嘅俄羅斯人又要再次走難，而今次佢哋就走到嚟香港，喺香港開設咗唔少俄國餐廳。同樣走難嘅亦都有上海人，佢哋戰前戰後都有唔少人嚟到香港，亦都係喺東區一帶開設俄國餐廳。隨住兩班人嘅移民，慢慢就將羅宋湯傳入香港，羅宋湯亦都成為唔少茶記嘅「例湯」之一。

原圖嚟自網絡