如果想了解黃帝至漢武帝太初年間嘅歷史，咁《史記》當然就係必讀嘅一本書啦，咁如果係想由珍奇博物、神話地理出發，了解上古史，咁就要介紹下號稱天下第一奇書嘅《山海經》喇！

《山海經》係一本先秦嘅古籍，入面嘅內容相當豐富，既有古代地理、物產、宗教、醫藥、民俗甚至連神話、巫術以至異獸都有記載，雖然現代學者會將《山海經》當做係巫書或者神話嚟看待，但喺古代佢曾經就係歷史嘅一部分。書中確實有神話嘅部分，但其實同時都記載咗百幾個古代邦國、水道、名山，甚至仲有學者統計過有277種動物都被描繪喺書入面。司馬遷仲曾經話過「至禹本紀、山〔海〕經所有怪物，余不敢言之也」。

《山海經》現行本一共就有十八篇，合共有三萬幾字，據講最初嘅《山海經》係有圖畫嘅存在，甚至當中嘅文字極有可能係根據圖畫內容而描述出嚟。只係，古代嘅圖畫並無流傳到，歷史南朝張僧繇又或宋代舒雅都試過重繪，但近代就只有明朝胡文煥本、蔣應鎬本流傳到。

《山海經》之所以叫做奇書，唔單止係因為入面內容涉及光怪陸離傳說又或者古代異獸，更加重要係呢本書連作者係邊個都冇人知！歷代就有人話呢本書作者應該係夏禹，但奇在夏禹之後嘅事書中亦有記載；亦有人指應該係周穆王；而普遍嚟講現代學者就覺得《山海經》係唔同時代唔同作者集體編寫出嚟嘅一個結果。

原圖嚟自網絡