今時今日如果大家得閒想搵個地方hea下攝下時間，確實係有好多唔同嘅選擇，可以去下café又或者去下市政大樓、圖書館等等，總之就點都會搵到個地方。之但係，如果時光倒流返去百幾年前，果陣時嘅人又可以去邊度呢？

答案就係香港第一座嘅公共文娛中心、1869年6月28日啟用嘅舊香港大會堂！如果有史友想去呢度睇下，咁就真係遺憾喇，事關呢座建築物喺1933年就已經拆卸咗。舊香港大會堂嘅舊址係位於香港匯豐總行大廈現址旁邊，呢座建築係由政府撥地，但喺建築費用方面就係嚟自市民捐款同埋發行股票籌集，所以就會有股東嘅存在，而當時最大嘅股東就係怡和洋行嘅羅拔·渣甸。

舊香港大會堂屬於仿巴洛克建築，樓高兩層，功能上就純粹為咗社區而設，有齊博物館、公共圖書館、休息室、劇院同埋大禮堂。雖然話就話係為社區，但當時嘅華人都唔可以隨便入去。呢個大會堂當時被視為係上流社會嘅社交場所，華人雖然可以入去，但就有唔少限制，而且仲要喺指定時段先至可以入內。

可能有史友會問，點解一座起咗幾十年嘅建築咁快就拆呢？當中原因就同匯豐銀行有關！喺1933年，舊香港大會堂嘅用地為咗配合匯豐銀行重建，就賣咗畀佢哋並且同年開始部分拆卸，後來嘅土地有部分仲係中國銀行大廈所用。舊香港大會堂去到1947年先完全拆卸，但新一代嘅大會堂要到1962年先啟用。

原圖嚟自網絡