繼續同史友們介紹香港嘅特色公共屋邨，之前就同大家介紹完樂富邨同埋橫頭磡邨，今次就轉一轉區域，同大家介紹一個位於觀塘區嘅公共屋邨——樂華邨。

樂華邨嘅前身係1950年代落成嘅復華村平房區，係為咗畀觀塘工業區工作嘅工人提供嘅住所，去到1978年就展開清拆重建。原址重建嘅樂華邨最初第一期係由舊長型嘅公屋為主，之後果幾期就有H型大廈同埋Y1型大廈，短時間內集齊幾種唔同類型嘅公屋。當時呢條公共屋邨有齊巴士總站、學校、街市同埋社區中心，設備都真係幾齊全下！

樂華邨係分階段落成嘅一條屋邨，喺1982年12月至1985年7月分4期落成。當中其實有分做樂華南邨、樂華北邨同埋一個居者有其屋計劃下嘅樂雅苑，呢「兩邨一苑」雖然都係樂華邨，但就分成三個唔同部分管理。呢座位於功樂道及振華道交界嘅屋邨，本身係拎咗呢兩條路之間「樂」同埋「華」命名，而後來就諗到可以有「快樂中華」嘅意思，於是喺設計成條屋邨嚟講，都以呢個作為主題，唔少地方都有住中式建築嘅元素，就好似月門、刻有中式書法嘅花崗石牌匾、商場嘅中式通花磚等等，而講到最出名嘅打卡位，就當然係停車場天台嘅涼亭，早排有唔少後生仔專程入去就係為咗影幾張相架！

原圖嚟自網絡