偷走龐貝古城碎片15年 加國婦行衰運懺悔寄回

位於意大利嘅古羅馬城市之一龐貝，喺公元79年被維蘇威火山爆發時嘅火山灰覆蓋，六米幾深嘅火山灰之下，埋藏咗唔少珍貴文物同雕刻，同時亦都有上具具人類嘅屍體，當時佢哋死狀都因為被火山灰包裹而定咗形，睇到都有啲驚。知道以上呢段歷史之後，竟然仲有遊客夠膽喺古城入面偷走文物，佢十幾年嚟嘅經歷仲引發各地嘅人討論「龐貝古城詛咒」。

件事係咁嘅，喺15年前就有一位加拿大女子去到意大利參觀龐貝古城遺址,當時就拎走咗幾塊古城碎片包括2塊白色馬賽克瓷磚、2片雙耳瓶的碎片同埋1片陶瓷碎片。當時佢心諗，偷走文物係想「擁有一片不能購買的歷史」，但點知衰運好快就嚟。喺15年間，佢就曾經兩次身患乳癌差啲喪命，後來仲陷入唔少財政問題，真係厄運連連。

最終，佢就決定將自己偷返嚟嘅文物寄返去龐貝古城旅遊管理部門，寫信道歉之餘亦都表示已經學到教訓，希望將得到上帝寬恕。而考古公園發言人都表示，近年有大約100名遊客歸還偷走嘅文物，當中唔少人都不約而同咁箱得文物一直帶來厄運。