尋日就同史友們介紹到潮州嘅牌坊街歷史,今次國家主席習近平嚟到潮州其實仲有去到「一橋一樓」,當中嘅橋係世界知名、號稱中國四大古橋嘅廣濟橋。

呢條廣濟橋建於公元1171年(南宋乾道七年),最初係叫做康濟橋,屬於浮橋類別,由浮船連結而成,全長518米,橫跨為紀念唐代文學家韓愈而命名嘅韓江。而講到形成「十八梭船廿四洲」嘅設計,就係由明朝宣德年間先開始。

呢條橋認真唔簡單,設計上盡顯建築嘅智慧!由東西兩邊數埋去,成條橋分別就有12同埋8個橋墩,喺中間嘅部分就係用18艘木船組成嘅浮橋。呢條「浮橋」正常情況之下就會閉合,行人可以喺橋上經過,船隻亦都可以喺兩邊通過;而當洪水泛濫果陣,呢條「浮橋」就會解開,中間嘅位置就可以用嚟排水。

呢種設計就被橋樑專家茅以升譽為「世界上最早的啟閉式橋梁」,簡單一條橋樑就有齊「梁橋、浮橋、拱橋」三種風格。去到1958年,當地政府就對呢條橋進行大規模修理與加固、按照明代嘅風格修復,仲成為埋全國重點文物保護單位。

原圖嚟自網絡