《獅子山下》、《前程錦繡》、《激光中》、《波斯貓》等等，一首首大家耳熟能詳嘅粵語金曲，帶領住70、80年代嘅香港樂壇發展，呢啲金曲同埋前衛嘅舞台風格影響住幾代香港人，為大家帶嚟呢啲享受嘅正正就係樂壇巨星羅文。

羅文，原名係叫做譚百先，出生喺廣西百色，自幼喺廣州長大，幼年曾經因為戰亂而嚟到香港暫居，後來又同父母重新返到廣州生活，並且接受舞蹈同埋粵劇訓練，曾經夢想成為粵劇紅伶。。有聽過佢唱歌嘅都會知道佢其中一個特色就係歌聲響亮之餘又可以字正腔圓，呢啲都同佢學過粵劇有關。

1962年佢就一個人移居香港，當時就只係去到荔園從事守閘員、去銀行做見習生，但無幾耐佢就去到灣仔嘅酒吧擔任業餘歌手，結果就被邵氏電影公司睇中，由英文歌開始唱，跟住就到國語同埋粵語流行曲，令佢攀上一個又一個高峰。70年代係佢最紅嘅年代，羅文憑住主題曲《前程錦繡》而爆紅，後來《小李飛刀》、《獅子山下》、《激光中》等歌曲都好受歡迎，《獅子山下》更加係幾代人回憶。

2002年10月18日，羅文因肝癌逝世，享年57歲。佢嘅主診醫生當年受訪就提到，佢最敬重嘅病人就係羅文，因為當佢知道自己肝臟有血瘤，佢依然笑容滿面，試過唔同方法醫治，直至離世前一刻都無放棄，佢用自己嘅生命演繹「用艱辛努力寫下那不朽香江名句」！

原圖嚟自網絡