最近有唔少人都講返中國抗美援朝呢段歷史,好多觀點同評論都出現咗。阿史唔係政評家同史學家,唔為呢段歷史評價太多。不過,介紹呢段歷史嘅一啲基本知識都係有意義嘅。

响上世紀五十年代發生嘅韓戰,對成個國際格局都有好重要嘅影響,咁中國當時點解要作出抗美援朝呢個行動呢?韓戰係由1950年至1953年發生於朝鮮半島嘅戰爭,戰爭大概可以分為四個階段,包括朝鮮民主主義人民共和國同大韓民國開戰,之後以美國為首嘅聯合國軍隊介入戰爭,繼而中國投入抗美援朝,同埋停戰階段。响1950年6月,朝鮮人民軍南攻大韓民國,無幾耐聯合國介入,美國就响9月派出軍隊實現仁川登陸,局勢逆轉,美軍仲越過三八線(北緯38度線,即蘇聯同美國响二戰時受降嘅分界線)北攻朝鮮。中國响美軍登陸仁川後就警告如果美軍越過三八線,中國唔會坐視不理。結果中國就派出中國人民志願軍投入呢場戰爭,抗美援朝成為中華人民共和國成立後第一次參與嘅對外戰爭。

中國之所以投入呢場戰爭,其實係有一啲原因,第一個就係朝鮮政府請求中國幫忙,蘇聯領袖斯太林都發電報俾毛澤東希望中國能夠幫忙。基本共產國家之間嘅緊密關係,亦有助鞏固中蘇同盟,獲得新中國建設所需嘅經濟援助同安全保障。另一個重要原因,就係基於國防安全。毛澤東响1953年講過:「如果不打回三八線,前線仍在鴨綠江和圖們江,瀋陽、鞍山、撫順這些地方的人民就不能安心生產。」即係毛澤東都唔想呢場戰爭嘅打仗位置太近中國邊境,擔心會將戰火引到中國境內,所以中國就要抗美援朝喇!

原圖嚟自網絡