早幾日阿史就同史友們介紹咗大家成日食,但未必知道叫咩名嘅「豉油西餐」,咁除咗呢種發源喺廣州、結合中式煮法嘅西餐之外,仲有冇其他款式嘅西餐呢?答案當然就係有啦!

喺介紹香港羅宋湯起源果陣,阿史就講過羅宋湯係因為俄國爆發十月革命先至傳到去上海,再經過上海人嘅調味同改良,先至令到羅宋湯得到國人嘅接受。其實唔止羅宋湯架,就連「海派西餐」都係咁!

喺1843年上海開埠之後,西方文化就好快傳入到上海,首當其衝就係西餐廳,但係早期嘅西餐半生半熟,而且調味方面又好唔同,中國人一開始係唔接受。所謂嘅「海派西餐」,其實就即係滬式西餐、上海西餐,係上海獨有嘅一種西餐,係上海人接照咗自己嘅口味同埋本地食材創造出嚟嘅西餐。雖然係叫做「海派西餐」,但其實入面都分成唔少唔少流派,就好似法式、意式、俄式、英式同埋德式等等。

喺1937年之前,成個上海就有成200幾間西餐廳,集中喺霞飛路、福州路,仲有「四馬路大菜」嘅叫法。直至今日為止,呢啲西餐喺上海都仲係好受歡迎,特別係羅宋湯、炸豬排、上海色拉、烙蛤蜊、烙蟹斗等待,都係海派西餐入面嘅名菜。

原圖嚟自網絡