早兩日就係「萬園之園」圓明園被英法聯軍洗劫破壞焚毀嘅160年，呢段歷史直到今時今日仍然有唔少中國人記得，係一件令人心痛嘅事。喺當日，圓明園嘅遺址公園就免費開放，唔少民眾都走入圓明園，親身見證同銘記呢段歷史。

喺1860年嘅10月18日，始建於清康熙四十八年（1709年）、歷經清室150年經營同埋創建而成、被稱為「萬園之園」嘅圓明園就喺英法聯軍之役入面被英軍洗劫破壞後放火焚毀，園內無數珍寶不知所蹤，巧奪天工嘅園林建築亦都付之一炬。喺呢個咁特別嘅日子，各界就對一件事引起熱烈嘅討論，就係圓明園應唔應該重建。

對於呢個問題，主流就有兩種睇法，第一種就係「廢墟派」，主張保持原狀，覺得咁樣可以反映歷史滄桑；而另一種睇法就係主張復建，希望可以通過重建而重新展示當年清朝盛時輝煌，而兩派嘅專家學者都爭持不下。

圓明園當中最出名嘅係放置12生肖獸首銅像嘅「海晏堂」，唔少獸首銅像已經重新回歸中國，但當中冇一個係安放返喺圓明園，所以單純討論文物安置嘅問題，國家文物局同埋圓明園嘅管理者都覺得，圓明園建立博物館已經是一種現實需要，唔知史友們又點睇啦？

原圖嚟自網絡