秘魯納斯卡沙漠 驚現2000歲「古貓」

喵星人相信唔少史友都好鍾意，唔講可能唔知，佢哋祖先其實係嚟自沙漠，而呢一點近排喺秘魯就更加印證到！

近排因為新冠肺炎疫情嘅關係，著名嘅景點、世界遺產秘魯納斯卡線（Nazca Lines）由於冇遊客嘅關係就決定進行維護工作。過往呢個地方都有考古學家發現唔少巨大地面圖形，就好似以大石頭同埋繩構成線條複雜排列，整出一個個圖案魚類、螺旋形、兀鷲、蜘蛛、花等等，呢啲圖案都被認為係納斯卡文明嘅一部分。

而喺近排嘅維護工作入面，考古學家就發現到一個新嘅納斯卡線圖案，係一個喺西元前200-100年間製作嘅古貓啊！據考古學家解釋，其實呢個圖騰位處一個受到侵蝕嘅山坡上，已經幾乎睇唔到，甚至仲就嚟消失，佢哋足足用咗一個星期對呢個圖案清理同埋維護，先至重新睇到隻貓嘅輪廓。據了解，呢隻「古貓」長約37米，線條寬度喺30至40厘米之間，估計有成二千年歷史，真係有趣！