喺廣東如果話去食好嘢,通常都會話去食「九大簋」,意思當然係指緊筵席極為豐富,但原來以前嘅「九大簋」真係各有所指,真係數到九樣餸出嚟!

「九大簋」入面嘅「簋」其實就係古代用嚟放置食物嘅器皿,有圓形同埋方形兩種設計,由木製、陶製、銅製都有存在,最早商周時期就已經有,當時仲同鼎被認定係核心列器制度入面,可以睇到佢有幾耐歷史同埋幾重要!

古時嘅簋曾經係專門嘅祭器,後來亦都喺貴族之間以食器流傳,簋盛放好多種唔同嘅食物,就好似各種黍稷、各類肉食。而當提到「九大」嘅時候,就即係代表隆重,因為「九大」係象徵住風、雲、雷、雨、海、火、水、地、天。

講咁耐到底「九大簋」有咩餸呢?當然歷代以嚟「九大簋」都有唔同版本,但喺廣東呢九味餸就主要係「乳豬拼盤」、「髮菜蠔豉炆豬腳」、「豉汁蟠龍鱔」、「豉油雞」、「酥炸生蠔」、「香芋扣肉」、「清蒸魚」、「時菜炒雜」同埋「瑤柱粟米羹」。所以大家成日話去食「九大簋」,可能未必食緊「九大簋」架!

原圖嚟自網絡