早排阿史就同大家介紹咗唔少香港嘅水務設施同埋水塘，呢一系列水務工程嘅建設都係反映一件事，就係香港嘅天然水源唔足夠！咁面對住呢個先天嘅限制，過往嘅港府就出過幾招嚟解決，一開頭就係起水塘、購入東江水，後來就係興建海水化淡廠。其中一座當年號稱係全世界最大規模海水化淡廠，就係樂安排海水化淡廠。

呢座海水化淡廠位於屯門區樂安排，正係青山公路小欖段。可能史友會問，點解起咗咁多個水塘同埋引入東江水之後，都仲要再起一個海水化淡廠呢？要知道，喺1963年6月開始，其實香港就發生咗嚴重嘅旱災，令到當時需要實施每4日供水4個鐘嘅制水措施，當年見到呢個咁嚴重嘅問題，港府就先後興建船灣淡水湖、萬宜水庫呢兩個水型水塘，又自從1965年開始，就向廣東省買入每日6200萬加侖食水，雖然係咁，但港府仲係覺得呢啲食水都仲係未足夠供應。

於是，喺1972年7月31日，港府就宣佈會喺樂安排興建海水化淡廠，當時呢個消息一公佈，隨即就有嚟自5個國家嘅7個財團投標，最後就由一個日本嘅財團以當時3.37億港元投得。早年成個計劃資金並唔足夠，海水化淡廠最後喺1975年10月15日建成，去到1977年香港又再次實施制水，當時呢個化淡廠真係「火力全開」，200個職員每日工作，為香港每日化淡18萬立方米淡水，但冇幾耐呢個海水化淡廠就停產。

類似嘅事1981年都發生過一次，海水化淡廠曾經重開過，但後來又因為燃料問題令到化淡成本飆升，再加上東江水供應大幅增加，令到海水化淡廠喺1982年正式關閉及停用，並且畀人收購同埋喺1992年爆破拆卸，原址已經成為一個跳蚤市場。

原圖嚟自網絡