如果提起「絞殺戰」呢個詞，可能唔少史友都會諗起二戰時期意大利北部戰場盟軍喺德軍據守嘅鐵路進行空中轟襲，令到德軍後方交通、運輸線路受到嚴重破壞，裝備物資都冇辦法完全送到前線，呢一招當時就被稱為「絞殺戰」。而唔講唔知，其實韓戰入面都出現過「絞殺戰」，中朝軍隊更加用埋「反『絞殺戰』」！

1950年6月25日韓戰爆發之後，美軍同聯合國軍就發現到一點，就係朝鮮半島地形同埋交通路線上似乎係好易受到「絞殺戰」嘅影響，於是就憑住空中嘅巨大優勢（空軍十個聯隊四個大隊1100架唔同型號戰機，後期仲去到1680架戰機），趁住朝鮮北部發生特大洪水災害，以高強度同埋密集咁轟炸朝鮮北部，金浦機場、燃料庫、橋樑、道路、鐵路、維修隊伍大受破壞，連本地生產武器都做唔到。成個計劃分成幾個目的，分別係摧毀北韓同中國志願軍嘅交通路線、運輸工具、物資囤積同埋儲存點。

聯軍嘅計劃開頭好成功，但後來戰事就進入膠著狀態，中方採取「反『絞殺戰』」，以8000幾人喺2100公里運輸線上晝夜監視聯合國軍飛機活動，一邊疏散、偽裝，令到34000噸物資搶運到前線。唔單止咁，志願軍空軍陸續投入戰爭，令到原來聯合國軍由清川江以南嘅轟炸線退出，令到中方有空間同時間加固、加寬、新修公路。

當時美軍就呢場「絞殺戰」相當唔滿意，事關佢哋表示「凡是炸斷了的鐵路，很少是在二十四小時內未能修復的」，而呢一場「反『絞殺戰』」，就係中朝方軍隊合力「隨炸隨修」，日頭炸完夜晚就修復，令到物資得以順利搶運到前線。

原圖嚟自網絡