「用20幾年時間,令到中國領先世界20年」,呢一句係南仁東嘅同事同埋學生對佢作出嘅評價,到底呢位被譽為「中國天眼」之父嘅人物一生做過啲咩事呢?

南仁東出生喺吉林遼源,自幼就天資聰敏,以吉林省理科「狀元」嘅成績考入清華大學建築系,但就被調劑到無線電科學系真空超高頻技術專業,佢當時係耿耿於懷。去到1968年,南仁東喺清華大學無線電系畢業,入到吉林省通化市無線電廠工作,由車間學徒做起,同時佢都繼續畫油畫。

咁南仁東係點樣同後來嘅中國天眼扯上關係呢?原來去到1969年,通化市無線電廠開始研發可攜式小型收音機,就搵嚟油畫美術功底好好嘅南仁東幫手,當時組員就已經覺得佢思維縝密、知識豐富,而最後呢款收音機亦都成為「向陽牌」產品暢通全國。

喺1993年,喺日本東京國際無線電科學聯盟大會,眼見科學家提出新一代射電望遠鏡計劃,但中國遠遠落后,南仁東相當唔好受,心入面就打算為中國建立一個最大嘅單口射電望遠鏡。當時呢個被視為係唔可能嘅任務,但南仁東仍然堅持。佢先喺1994年到2005年由北京到貴州,只為搵一個可以安放呢個巨型射電望遠鏡嘅地方,與此同時佢亦都進行緊FAST嘅研究,帶領FAST渡過一次又一次危機。

2016年9月25日,被譽為「中國天眼」嘅500米口徑球面射電望遠鏡(FAST)喺貴州竣工,成為全球最大嘅射電望遠鏡。2017年9月15日,南仁東因罹患癌症逝世;2018年10月15日,中科院國家天文台宣布將一粒小行星正式命名為「南仁東星」,紀念呢位夢想直抵蒼穹嘅「『天眼』築夢人」。

原圖嚟自網絡