海防道嘅前身係為紀念額彌金而命名？

早幾日就係圓明園被英法聯軍焚毁160年嘅日子，喺圓明園嘅遺址就有唔少市民自發到場見證同紀念，唔知史友們又知唔知，英法聯軍採取掠奪同埋焚毁圓明園嘅行動，係同一個人有好大嘅關係，呢個係就係負責下令焚毀圓明園嘅額彌金，而喺香港就有一條路係為紀念額彌金而命名。

阿史所講嘅呢條路之唔係海防道囉！海防道位於香港九龍尖沙咀，連接住廣東道同埋彌敦道，係一條相當繁華嘅街道。呢條喺1865年落成嘅道路，最初並唔係叫做海防道（Haiphong Road），而係叫做額彌金道或者伊利近道（Elgin Road）。

咁到底點解會冇啦啦以佢嘅名嚟命名道路呢？原來係為咗紀念額彌金喺1861年以英國駐華全權代表嘅身份由清政府接收界限街以南嘅九龍半島，將呢片土地納入咗殖民地政府管治範圍。於是，喺當時開發尖沙咀嘅時候，就用到額彌金道命名。至於點解後來又會改名做海防道呢？原來當香港繼續發展嘅時候，就發現唔少街道嘅名都相似、甚至仲相同，對郵政服務同埋政府而言都好唔方便，於是港府就喺1903年對九龍嘅街道重新命名，額彌金道就改名叫做海防道。