早排香港歷史博物館嘅常設展覽「香港故事」就宣佈會關閉更新，增加近十幾年嘅香港歷史，呢個消息一傳出就引嚟唔少市民前往參觀，最尾一日仲大排長龍。而其實除咗位於尖沙咀嘅香港歷史博物館之後，全港多個地方都有歷史博物館嘅分館架！其中一個阿史好鍾意嘅就係海防博物館。

海防博物館位於東區筲箕灣，同尖沙咀嘅唔同，呢個分館前身真係一座歷史建築——舊鯉魚門炮台。喺地理位置上嚟講，鯉魚門正係控制維多利亞港東面入口，所以英軍1844年就喺西灣地區修築兵營，但當時就因為氣候同埋疫症問題，令到最早期嘅兵營需要廢棄。

去到1885年，英軍決定喺鯉魚門水道南面岬角修築鯉魚門炮台，仲加設埋保護炮台嘅碉堡、營房，令到呢個炮台成為防衛香港島東部的要塞。當年就由英國皇家工程兵設計、建造，用泥土掩埋18個地下室、彈藥庫、炮彈裝配室及煤倉等等，仲設有兩門「隱沒式」6吋口徑後裝海岸炮， 1890年代仲加設埋當時最具威力嘅布倫南魚雷，設備認真齊全！

去到二戰，呢個炮台經過幾次攻守就被日軍強攻成功，戰後由於呢度唔再係戰略重要，英軍就改用為操練場同埋住宅用途，後來連東區走廊設計都可以喺軍營入面穿過。1987年，英軍撤出鯉魚門軍營，將軍營移交畀香港政府規劃發展，部分用地就劃作鯉魚門公園及度假村；而鯉魚門炮台位置就被改建成博物館，分成接待大樓、堡壘及古蹟徑三個部分，為市民介紹唔同年代嘅香港防衛歷史。

溫馨提示，海防博物館近排都關閉進行更新工程，所以史友們如果想去參觀可能都要過一排先得喇！

原圖嚟自網絡