今時今日提起利舞臺,年紀比較細嘅史友可能只會知道利舞臺係一座商業大廈,但喺依家呢座大廈嘅前身,其實利舞臺曾經係一間好出名嘅戲員,唔少大型活動都喺入面舉行。

昔日利舞臺嘅位置正係波斯富街、霎東街交界,係當時一個相當高級嘅娛樂表演場地。利希慎家族喺1920年代買入利園山地皮,為咗方便母親等佢唔洗再去到西環先有得睇粵劇,於是利希慎決定拎利園山部分土地用嚟興建一個舞台,所以就叫做利舞臺喇!

呢個舞台喺1925年建成,當時就搵嚟中國首位電影皇后胡蝶剪綵開幕,關德興同埋新大陸粵劇團就演出第一場粵劇,夠晒派頭。利舞臺其後繼續發展,以粵劇、歌劇及演唱會等表演為主;去到70年代,利氏家族買入咗無線股份,1973年就決定喺呢度舉行第一屆香港小姐競選,自此以後呢度亦都成為香港小姐競選決賽嘅地方。

唔單止香港小姐,近代都有唔少巴閉嘅人物到過呢個舞台舉行佢哋嘅演唱會,就好似羅文、歐陽菲菲、鄧麗君、甄妮、梅艷芳等等。利舞臺亦都被用作電影院嘅用途,喺拆卸之前就播放咗《未來戰士續集》,應該有唔少史友都會記得。

去到1980年代,由於經濟起飛,地價不斷上升,當時利家就已經思考緊重建呢個地方獲取更大收益,而去到1991年3月亦都正式拍板,1991年8月18日,利舞臺正式謝幕。

原圖嚟自網絡