近年嚟國內都有唔少考古遺址有重大發現，對還原古代歷史嚟講都真係重要嘅線索。考古學同盜墓唔同，考古學講求對遺址調查、發掘同埋對所收集資料嘅分析，涉及眾多範疇嘅知識，為嘅都只係一個目的，就係透過重建古代人嘅物質文化同埋環境資料。今日中國嘅考學學之所以有咁良好嘅發展，就同一個人有關，佢就係「七國院士」夏鼐。

夏鼐出生喺1910年嘅浙江省溫州市，1934喺清華大學歷史系畢業，去到1935年，佢參加咗一次重要嘅考古發掘，就係殷墟考古發掘工作，展開佢嘅考古學生涯。冇幾耐，佢就去到英國倫敦大學學院攻讀埃及考古學。

1939年，佢嘅考古學研究一度被二戰中斷，佢喺二戰爆發後本身打算返到中國，但中途就滯留喺埃及，佢就只好去到開羅博物館從事文物研究工作。去到1941年，佢就返到中國擔任中央博物院籌備處擔任專門委員，後來仲做埋中央研究院歷史語言研究所研究員、浙江大學教授、中國科學院考古研究所所長等等，喺50年代嘅時候佢就已經係中國考古學界舉足輕重嘅一個人物。

喺佢考古生涯入面，主持過幾項好重要嘅發掘工作，就好似1951年湖南戰國和漢朝墓葬發掘工作、1955年河南省導黃河水庫考古隊發掘同埋1956年明朝定陵發掘工作等。去到1979年，佢就被推選為中國考古學會的理事長，後來仲成為《中國大百科全書》、《中國大百科全書·考古》總編輯委員，除此之外佢仲寫落《新中國的考古收穫》、《考古學論文集》、《中國考古學研究》、《碳-14測定年代和中國史前考古》等著作，為中國考古學界奠下唔少嘅基礎。

夏鼐先後得到中國、英國、德國、瑞典、美國、意大利同埋第三世界科學院授予榮譽，係名乎其實「七國院士」。

原圖嚟自網絡