北魏皇帝祭天遺址原來係咁樣？

近排喺內地嘅考古學界就有一件大事發生，就係位於內蒙古呼和浩特市武川縣境內嘅一座北魏皇帝祭天遺址進行了考古發掘，呢次亦都係國內第一次發掘到北魏皇家祭天遺址，就咁睇啲航拍機影出嚟嘅相都覺得壯觀啊！

據考古學家公佈嘅數據，暫時發現到嘅遺址位處大青山蜈蚣壩頂上，面積仲達到1萬平方米，真係相當巨型！其實呢個遺址就唔係乜嘢新鮮事，早喺上世紀80年代就已經被發現，只係當時嘅考古資源同埋科技都仲未有今日咁發達，一直都未進行大規模發掘。而自從2019年起，考古人員先開始喺呢個遺址研究形制同埋結構等等。

咁呢次發掘又搵到啲乜嘢出嚟？考古人員就喺呢個遺址中心搵到一座皇帝祭天圓形房屋遺址，房址內徑約15.5米，外徑約32.5米，仲留有祭祀用陶罐、羊、馬等祭品、肢骨。呢個遺址形制上結合咗中原王朝祭祀禮制同埋北方游牧民族祭祀傳統，年代仲早過西安隋唐圜丘、北京明清天壇，係極為珍貴嘅研究實證。