老牌影星辛康納利逝世，全球影迷都覺得好可惜，特別係一眾邦迷，因為辛康納利被譽為「最經典占士邦」。

占士邦007系列响呢幾十年拍咗好多集，演過007嘅演員都唔少，好似羅渣摩亞、皮雅斯布士南、鐵摩達頓等。不過唔少人對第一代占士邦辛康納利就係經典中嘅經典。上世紀五六十年代，伊恩·法蘭明嘅007小說系列開始被拍成電影，電影公司搵男主角個陣就揀中辛康納利，因為佢又高大又大隻又靚仔，結果佢拍咗第一部《鐵金剛勇破神秘島》（Dr. No），大受歡迎，辛康納利亦一舉成名。之後佢再拍多五部007系列電影。值得一提，佢拍第五部007電影《鐵金剛勇破火箭嶺》（You Only Live Twice），有唔少場景係响香港拍攝。

雖然一直都話辛康納利演過六部007系列電影，但其實佢响1983年都演過占士邦呢個角色，就係响《鐵金剛勇奪巡航導彈》（Never Say Never Again）當中。不過呢套唔係美高梅拍嘅，所以就無被計入官方占士邦系列裡面。

阿史雖然唔算係邦迷，但占士邦電影都睇咗唔少，好記得對辛康納利演占士邦嘅印象，就係佢响泳池附近間房，一邊用望遠鏡監視目標人物，旁邊就有位美女同佢親熱，仲有辛康納利心口個一大堆胸毛。

原圖嚟自網絡