全球第一份彩色新聞報紙《天天日報》創刊

今時今日嘅媒體發展相當發達，既有傳統嘅媒體運作緊，亦都有新式嘅媒體出現，真係可以話係百花齊放。而喺上世紀60年代，市民主要接觸到嘅除咗電台，就真係得報紙，單單一份彩色新聞報紙面世，就已經可以引起唔少關注。

阿史想講嘅之唔係《天天日報》囉！喺1960年嘅今日，韋氏家族創辦全港第一份「柯式」彩圖印刷日報，據講呢份唔止係第一份香港彩色日報，甚至仲係世界上第一份彩色新聞報紙。呢份報紙嘅出現哄動成個出版界，但運行十七年之後，就進行咗幾次股權易手。

喺1977年8月，《天天日報》股權就由妙麗集團負責人劉天就購入，佢就為呢份報紙進行咗改革，令到原本1977年一萬幾份銷量嘅報紙，好快就喺1982年衝破十萬大關。80、90年代係《天天日報》最光輝嘅時代，當年呢份報紙銷量甚至去到20幾萬，被評為受眾取向最大眾化嘅一份報紙。