再過幾日就係美國總統大選嘅日子，呢排亦都有唔少嘅提前投票同埋造勢活動等等，選情都真係幾激烈下。望住近排嘅新聞同選情，就有人提出會唔會重演返1876年美國總統大選嘅局面啦，咁今次阿史就同大家介紹下啦！

1876年美國總統大選，係由民主黨候選人蒂爾登（Samuel Tilden）同共和黨海斯（Rutherford B. Hayes）爭奪總統嘅位置。當時正係美國南北戰爭之後，正需要為全國進行重建。當時民主黨係代表住南方嘅群體同利益，而共和黨就想保障黑人嘅公民、政治權利；而且民主黨掌控住眾議院，共和黨控制白宮同埋參議院，完全係一個對立嘅局面。

於是喺1876年呢場大選入面，兩方都出盡力動員投票，投票率接近八成咁多。成個美國當年有369張選舉人票，選舉完結後，唔計佛羅里達、路易斯安那及南卡羅萊納3個州合共20張選舉人票，蒂爾登就得到184張，而海斯就有165張。

咁問題嚟喇，兩邊都話自己拎到呢3個州嘅票數，呢20張選舉人票點算呢？雙方成立咗一個選舉委員會，參議院、眾議院各自有5個人加入，最高法院都一樣有，另外仲有呢兩個黨自己推舉嘅人。經過長時間討論同爭議，去到1877年2月，呢個委員會以8票對7票嘅比例，將呢20張選舉人票判咗畀共和黨海斯，佢最後就以1張選舉人票之差擊敗咗贏得普選票嘅蒂爾登，呢場選舉亦都係美國史上最具爭議嘅大選。

原圖嚟自網絡