港府宣布與美國迪士尼公司 合資興建迪士尼樂園

近排疫情開始緩和，抗疫疲勞之下唔少港人都會去海洋公園同埋迪士尼樂園玩。喺2005年之前，香港都仲未有迪士尼樂園，甚至只係得海洋公園一個熱門嘅主題公園。喺1999年嘅今日，港府宣布與美國迪士尼公司合資興建迪士尼樂園。

位於大嶼山嘅迪士尼樂園，係全球第五座、亞洲二座迪士尼主題樂園之一，但喺五座主題樂園入面，香港迪士尼樂園有樣巴閉嘅地方，就係全球「最細」。喺開園嘅時候，呢個樂園就只係得28公頃，雖然之後經過兩輪擴建，但仍然都係全球最細嘅迪士尼樂園。

咁都同史友們講過，其實迪士尼樂園計劃係1999年11月2日拍板進行，而當年其實香港嘅經濟衰退，起呢個樂園其中一個目的係希望可以振興旅遊業，於是當年成個計劃一共用咗57億港元，港府就投入咗32.5億港元佔咗57%股權，其餘就由美國迪士尼公司出錢。