【講開有段故】2000年美國總統大選 選完仲有「選後大戰」？

繼續同大家介紹近排廣受全球關注嘅一場選舉，美國總統大選。前日阿史就同史友們介紹咗美國史上最具爭議嘅1876年美國總統大選，呢場選舉距離大家可能比較遠，所以阿史就再揀咗2000年美國總統大選同大家介紹下！

2000年美國總統大選相信史友們都唔會覺得陌生，就係由共和黨候選人喬治布殊對民主黨候選人戈爾（Al Gore）。當時選舉完結咗之後，未計佛羅里達州25張選舉人團選擇，當時戈爾就有267張選票，而喬治布殊就有246票，所以呢25張選票係會一決勝負。

咁點解唯獨係呢25張選票未決定到呢？原來當中就有兩個問題，第一個就係佛羅里達州嘅設計嘅「蝴蝶選票」（butterfly ballot）將兩黨候選人名字排列兩側，而投票打窿嘅位就喺中間，令到選民好困惑；而且仲有唔少選票打窿個位唔徹底，令到有問題選票嘅出現。

咁呢件事最後點解決呢？州政府11月26日宣佈喬治布殊以537票獲勝，戈爾果邊當然唔服啦，後來就告到上佛羅里達州最高法院要求重新點票，而喬治布殊就告到去美國聯邦最高法院，要求停止重新點票。結果，聯邦大法官5比4推翻了佛羅里達州法庭裁決，喬治布殊最後以271對266張選舉人票勝出，而實際投票票數，其實喬治布殊票數係比戈爾少50萬張，就係咁，呢場就被稱為「選後大戰」。

原圖嚟自網絡