早幾年內地嘅歌影視題材上就興起一股考古熱潮，一連就出咗幾部相關題材嘅電影同埋電視劇，而且每套嘅收視都唔差，真係紅極一時。阿史當年就有睇過《鬼吹燈》，仲記得有部改編嘅電影係叫做《九層妖塔》，咁現實入面當然就冇呢啲故事，但就有一座被網民叫做「九層妖塔」嘅古墓近日開始發掘。

呢座「九層妖塔」其實就係青海海西蒙古族藏族自治州都蘭縣嘅熱水墓群，當中嘅「熱水2018血渭一號墓」兩年前就曾經被非法盜掘，呢件事震驚全國。事後當局就派出考古隊發掘，當時就已經知道呢批墓葬係高等級墓葬，而且結構相當完整，係唐（吐蕃）時期高級貴族墓葬。

咁點解呢個墓葬會被稱為「九層妖塔」呢？原來熱水墓群真係有九層結構，三層係泥土、其餘就係由石頭重複疊加，九層都相當險要，當地人仲將呢個區域叫做「妖魔洞」。經過兩年幾發掘之後，考古隊伍基本上已經掌握墓葬結構，地上就係墓園建築，而地下就相當複雜，分成墓道、照牆、甬道、墓門、墓壙、墓室等，近排仲搵到長條形殉馬坑、動物骨骼、木鞘鐵劍、金銀器、銅器、鐵器等接近一千幾件，對研究唐時期熱水地區嘅葬制葬俗有住相當重要嘅價值。

原圖嚟自網絡