近年嚟西灣河嘅太安樓相當出名，畀唔同媒體廣泛介紹之後已經成為大家覓食嘅好去處。呢棟舊樓除咗係食好野嘅地方，仲係一座相當出名嘅樓宇啊！

太安樓位處東區西灣河筲箕灣道，附近直接就係西灣河站，又連接住筲箕灣道、東區走廊，交通真係四通八達。呢座樓宇喺1968年由香港置地集團發展，係一座單棟式嘅建築物，建成初年仲係面臨海邊，食正成個海景。唔單止咁，太安樓地下仲要係商場，美食、文具、銀行、超市、五金行、油站、戲院樣樣一應俱全，十足十成個小社區咁，據講當年呢個商場仲係亞洲最大嘅商場，真係誇張。

而去到1980年代，西灣河碼頭搬遷，東區走廊亦都興建，呢區海旁位置亦都進行填海，目前成個鯉景灣都係填海得返嚟，太安樓亦都唔係對正個海喇！據2016年嘅政府人口普查資料，呢座每層有68個單位嘅舊樓一共有2312戶，居民人數有5255人，係全港最多人住嘅單一建築物，而呢個紀錄相信到依家都未有改變。

原圖嚟自網絡