唐伯虎扮傻避寧王？

如果有睇過《唐伯虎點秋香》嘅史友們，都應該會記得寧王派人去唐府搵唐伯虎，响周星馳版本就係佢食雞翼個幕。不過，响歷史上寧王同唐伯虎嘅關係，就一啲都唔簡單。

唐伯虎，係明代著名畫家、文學家，亦明代著名才子。响正德九年，佢就成為寧王朱宸濠嘅幕賓。寧王朱宸濠係朱元璋第十七子寧王朱權五世孫，雖然佢係皇族，但就野心極大，早就有造反嘅打算。唐寅後嚟發現寧王有造反企圖，於是「佯狂使酒，露其醜穢」，實行裝癲扮傻唔參與。《唐伯虎點秋香》中唐寅嘅表現，就應該係按呢段歷史創作出嚟。後嚟寧王都頂佢唔順，於是放走咗佢。

咁寧王造反件事又點呢？寧王就响正德十四年起兵造反，不過就維持咗三十五日就被平定，史稱宸濠之亂，後嚟寧王亦被處死。