鴉片戰爭前哨戰——官涌之戰

鴉片戰爭嘅歷史就同史友們講唔少，而尋日就係被稱為鴉片戰爭前哨戰官涌之戰爆發嘅第181年，而呢場戰爭發生嘅地方亦都係喺尖沙咀一帶。

咁點解呢場戰役會發生呢？原來道光皇帝任命林則徐為欽差大臣，去到廣東查禁鴉片之後，林則徐就查禁咗煙土二萬箱，仲喺1839年6月喺虎門海灘當眾銷毀煙土，令到英國損失慘重。當時英國就已經想用武力解決問題，先後就發動過1839年9月4日九龍海戰、穿鼻之戰，而官涌之戰就係呢三場鴉片戰爭前哨戰嘅其中一場。

喺1839年11月，清軍為咗防止英軍入侵，欽差大臣林則徐、兩廣總督鄧廷楨同埋水師提督關天培就喺尖沙咀以北官涌山布防，當時官涌營盤居高臨下，可以俯擊英軍。於是，喺1839年11月3至13日，義律就帶同英軍就不斷海陸進攻、偷襲官涌，「大小接仗六次」，但都被駐守清軍擊敗。英國軍艦連同鴉片船逃離尖沙咀洋面。事後，林則徐、鄧廷楨、關天培為防英軍再犯，仲喺尖沙嘴、官涌添置炮台，全盛時期有成五十幾門大炮。