由細到大無論係教科書定係電視，喺介紹香港果陣都係提到香港最初係一個漁村，但唔知史友們又知唔知，其實香港以前都係一個絲苗白米嘅產地，元朗出產嘅白米仲係相當巴閉架！

喺香港未開埠之前，明清年間就已經有唔少人係靠種植白米為生，當時係以元朗嘅絲苗米聞名，曾經仲做過皇帝嘅貢米，真係威水。元朗係香港境內少有嘅一個肥沃平原，區內有唔少魚塘，魚塘嘅肥料又滲入農田，令到禾田營養充足。喺1910年代，其實呢款白米就已經出口去海外，最遠賣到去葡萄牙，唔少日本人都會專程嚟到香港採購呢隻米。

踏入六十年代，香港人口激增，本地米難以滿足到咁多人口，於是就喺廣州引入油粘米、再加上後來嘅越南米，令到元朗絲苗米慢慢淡出市場。需求減少之下，原本嘅農田逐漸荒廢，元朗就甚少再出產絲苗白米喇！

原圖嚟自網絡