早前阿史介紹咗太古地鐵站，其實細細個陣成日都覺得有啲地鐵好鬼深，啲電梯又好長好高。咁好喇！香港最深嘅地鐵站，史友們又知唔知係邊個呢？

答案就係香港大學站喇！呢個响2014年啟用嘅地鐵站，係現時最大同最深嘅洞穴式地下鐵路車站，呢個站深入地底有成70米，而大堂至A2出口更有100米嘅高度差距。咁點解會挖到咁深呢？據了解，呢個站咁深係因為受西區地勢影響，地勢高低落差大，所以响山體下方興建嘅車站就要挖深啲確保結構安全。另一方面，因為車站要兼顧山下石塘咀同山上香港大學一帶乘客之需要，所以車站同部分出口高度距離就差距好大喇！

原圖：網絡